علي الرغم من ان العنوان يضحك و يخليك "تشكرلي" قبل ما تقرا التدوينة، الا اني مازلت شايفة ان في فوايد كتير الي جانب الاحباطات الكتير برضه ...
شوف يا سيدي ، اول هام معدناش نخاف من حد بالرغم من ان اسلوب القمع و تكميم الافواه لسه موجود و علي اشده، كفاية ان اي مصيبة بتحصل تخليلك بدل ما تندب و تلطم لوحدك بقي عندك مجال انك تسب للرئيس ميت ملة عن طريق تويتر بما ان الرئيس المظفر بقي عنده اكاونت ما شاء الله - ده برضه من انجازات الثورة ان رئيسك بقي عنده حساب علي تويتر، هو اللي جابه لنفسه بقي.
تاني هام، اهتمامنا زاد بالسياسة بعد ما كان آخرنا نتفرج ع المسلماني و هو بيرسم خرايط.
تالت هام يا سيدي و ما سيدك الا انا وده في رأيي المتواضع مهم اوي جدا خالص ، ان الكيان الخرافي اللي اسمه جماعة الإخوان المسلمين و اللي قطاع كبير جدا من الشعب المصري الغلبان الفقير كان فاكر انهم هيجيبوا الديب من ديله و يلاعبوه صلح ، ثبت بما لايدع مجال للشك ان أخرهم يجيبوا الخروف من ليته و بقعدوه علي كرسي و يقولوله اول ما تشوف حد جاي ناحيتك قوله "انا رئيس مصر بس و المرشد الكبير هو اللي قالي اقول كدة"، و ده اللي خلي اغلب اللي انتخبوا مرسي سواء عصروا ليمون او معصروش يتأكدوا ان مش كل من رفع راية "الاسلام هو الحل" هيحل او يربط بالضرورة.
رابع هام بقي و بالرغم من ان رابع هام دي حاجة تحزن حبتين، ان اغلب اللي كنا فاكرينهم وطنيين ثوريين بيحبوا مصر - يا حبيبتي يا مصر - طلعوا ما بيحبوش مصر و لا حاجة و انهم في حالة عشق و وله بالذات اكتر من حالة الحب اللي شوفناها في مسلسل العشق الممنوع و فاطمة مجتمعين.
في فوايد تانية بقي ع الماشي كده، زي ان اهتمامنا بالفن زاد، بقينا نهتم نسمع موسيقي و اغاني لناس مش معروفين خالص و نروحلهم مخصوص ، اهتمامنا بالكتاب الجدد زاد ، احساسنا باننا لازم نبقي من جوانا احسن زاد ، معدناش نصدق اي حد يقول اي حاجة الا لما نشوف بعنينا و نحلل قبل ما ننجرف في حماسنا زي زمان.
الجزء اللي فات ده علي الرغم من ان كتير هيقولي بس ده مش انجاز قوي ، اقولهم بالعكس ... ابصلوطلي، ده ده بالذات اهم انجاز.. اننا نتغير من جوانا ده احسن مليون مرة من اعظم زعيم هيحكمنا ، لإن ساعتها الشعب اللي هيبقي الحاكم مش اللي قاعد ع الكرسي.
عموما لو ماقتنعتش بكل ما سبق فا انا مش هلومك ، من حقك تحس ان مفيش فايدة و اننا مش هنتغير ابدا، بس رجاء اخير ..... ، ياريت تحتفظ باحساسك ده لنفسك عشان انا مش ناقصة و ما اصدق حد يسودها في وشي عشان اسب لميتين ام البلد دي و اهج.
